Heit is a lusada Dooch
s Wedda a weng tröiwe
owa aso wöi ganz fei aus Suiwa triem.
D Vegl singa kloalaud und staad
koa Trulla traudse affesteign ed Höi
wöi wenn earana ganza Gsang
ena Touch eipackld waar.
Nix rüat se
koa Astal, koa Blall
d Baam holdn schia s Schnoaufa o.
Ma ko direckt des Vogeh
vo de Minuttn spüan.
A Zfrienheit kimmt iüwa mi
na gehds wieda davu.
Eitz michade gearn irchandwou andast hi.
En Bon om
folld a Tir es Gschloß.
Is wea do?
Tappd wea owa
iüwa d Schdöing?
Enan Dooch wöi heit
kaandt oana vo weit hear kemma
und mi midnemma.

Katharina Bošnjak