Von Paul Holzreiter

San amoi drei Mannsbilder mit der Eisenbahn g’fahr’n. Und zwar sans mit der Eisenbahn nach Schottland auffeg’fahr’n. San drei g’standene Mannsbilder g’wen, die drei. San no nia droben in Schottland g’wen, die drei. Der Mo, der wo da so g’scheit daherreden tuat und all’s darzählen tuat, der Mo bin i – obwohl i gar net dabei g’wen bin, damals, wia die drei nach Schottland auffeg’fahr’n san. Mir ham sa’s nur darzölt, die drei, wia dass des damals g’wen is drob’n in Schottland.

Die drei san mit der Eisenbahn nach Schottland auffe-g’fahr’n. Und wia’s nach Schottland auffikemma, was moanan Sie, dass sie da seg’n, die drei, kaum dass nach Schottland auffikemma und beim Fenster ausseschaug’n?

Die drei, des hab i zun sagen vergessen, wo da nach Schottland auffeg’fahr’n san, san koane Deppen net g’wen. Der oane is a Techniker g’wen, der andere war a Mathematiker und der dritte is a Philosoph g’wen.

Wia die drei in Schottland bein Fenster ausseschaugn, was segn’s da? Was moanan Sie, dass die drei da seg’n, wia’s bei’n Fenster ausseschaug’n? Sie segn – a schwarzes Schaf.

„Ah“, sagt der Techniker, der wo a praktischer Mensch is, wo gern Autos reparieren tuat und so, „des soll Schottland sein?“, sagt er. „Und in Schottland soll’n die Schaf alle schwarz sein?“

„Na“, sagt der Mathematiker, „des is doch bloß a oanzelnes Schaf. Du glaubst doch net wirklich“, sagt er zu dem Techniker, „dass alle Schaf in Schottland schwarz sein müassn, nur weil unser Eisenbahn zufällig bei an oanzalnen Schaf vorbeifahr’n tuat, des wo schwarz is? Des glaubst du doch net wirklich, oder? Es gibt“, sagt er zu dem Techniker, „ja, des muaß i zuageb’n, es gibt in Schottland mindestens oa Schaf, des wo schwarz is, des muaß i zuageb’n“, sagt er, „aber mehr als des tat’ i net zuageb’n.“

„Na“, sagt der Philosoph, der wo von die drei am allerwenigsten reden tuat, „na“, sagt er zu dem Mathematiker, „du gibst was zua, von dem du in Wirklichkeit überhaupt koa Ahnung net hast. Du gibst zua, sagst du, dass es in Schottland mindestens oa Schaf gibt, des wo schwarz is. So ebb’s tat i nia zuageb’n, weil i gar net wissat, was für a Farb dass des Schaf wirklich hat. I könnt’ im allerbesten Fall zuageb’n, dass des Schaf auf oana Seit’n schwarz is. Von der anderen Seit’n hab’ i überhaupt koa’ Ahnung net. Und du, mei liaba Mathematiker, woaßt aa net, was für a Farb dass des Schaf auf dera drüber’n Seit’n hat.“

* * *

Der Mo, i hab’s ganz am Anfang scho g’sagt, der Mo bin i, und i hab scho vü Schaf g’seng. Und all die Schaf, die wo i g’seng hab und die auf oana Seit’n schwarz g’wen san, san auf dera anderen Seit’n aa all’wei schwarz g’wen. Und sell’ne Schaf, die wo auf oana Seit’n weiß g’wen san, san auf dera ander’n Seit’n aa immer weiß g’wen.

Der Mo bin i und i bin der Karl Popper und i sag euch, es nutzt euch überhaupt nix, wia vüle Schaf dass ihr scho g’seng habt’s und dass links und rechts immer alle gleich g’wen san, weil es kunnt trotzdem irgendwo a Schaf ummanand laffa, des wo links und rechts verschiedene Farben hat.

Und unser superg’scheiter Philosoph – der sagt, dass er nur a Schaf siecht, des wo auf oana Seit’n schwarz ist – unser superg’scheiter Philosoph hat nämlich aa koa Ahnung net. Weil i hab scho g’sagt, dass i der Karl Popper bin, und wenn der Philosoph a schwarzes Schaf siecht, na siecht er in Wirklichkeit überhaupt koa Schaf net, sondern er siecht die Lichtstrahlen, die wo von dem schwarzen Schaf zu eahm ieba kemma und auf die Lichtstrahlen is genau so wenig Verlass wia auf die Hunderte von Schaf, die unsere drei Mannsbilder scho all g’seng ham und die links und rechts immer alle gleich ausg’schaut ham.

Der Philosoph hat no nia an Lichtstrahl g’seng, der wo eahm betrogen hätt, aber der Mo – i hab’s euch scho g’sagt – der Mo bin i und der Karl Popper hat den Induktivschluss streng verboten und es nutzt die drei Mander überhaupt nix, wia vüle Schaf dass sie scho g’seng ham, weil des nächste Schaf, des wo sie seng, kunnt’ scho’ wieder ganz anders sein.

Mit diesem Text gewann der Autor den Haidhauser Werkstattpreis 2022.